Day 16: for ngana.

Manado, 14 Februari 2015

for ngana,

langsung pa de pe inti jo neh. jah. pe bogo skali kang kita? kyapa itu malam kita lari e? lebay skali do. mar, kita mo setau pa ngana kyapa kita lari. itu lantaran kita malu, coy. kita de pe orang ja ba aneh kalo bakudapa deng orang yang kita suka. kita pe salah sih, so tau - tau ngana nyanda suka orang yang babagitu, kita pi bekeng. 

kalo kita nyanda lari pasti skarang torang masih batamang kang? masih da bae - bae?

mar kita kangen pa ngana. kita suka mo lia ngana ulang. kapan kang torang bole mo baku dapa ulang?

biar jo ngana cuek - cuek rupa tuhari, nyanda apa - apa.

ngana tau, di sbelah kita pe kos dorang da bekeng acara kong putar lagu kong de pe volume besar skali, rupa mo gila kita ini. kita so nintau mo tulis surat deng kata - kata bagemana ni dia, makanya kita tulis jo noh deng logat manado. so susah kita pe ontak mo bapikir. so buntu. lantaran dorang da putar ni lagu "goyang dumang" ulang - ulang. hadehhh, so mo pica kita pe kapala. rupa da nae angkot ini kita, padahal ada di kos. riki kita so hafal de pe lirik ngana tau.

sudah jo neh. yang penting kita so bilang kalo kita kangen pangana. semoga torang bole mo bakudapa nanti. so nintau ini kita mo tulis apa. neh. bye!

yang stres da dengar ni lagu "goyang dumang" ni dia,

kita.